Dalebüd Cifala de 2007, Yanul 1, Nüm: 1
Sog Bevünetik Volapüka binon konlet utanas, kels löükons namis ad nämükön sevi okas e votikanas tefü pük bevünetik Volapük fa hiel Johann Martin Schleyer e ma revids ela Arie de Jong.
Topät calöfik Soga binon ladet Cifala.
Sog e vobots onik pasevons dub siämamäk, in zän kela binon talaglöp blägik in mel vietik, ko liens stedik zänik; bal horitätik, votik penditik, e liens fol bofaflanü liens stedik: fol plo lunets krugöl zü povs e fol pro videts krugöl zü zänod. Zü vol in tan silablövik binons vöds blägik tonatas mayudik, sus talaglöp: VOLAPÜK, e dis talaglöp: MENEFE BAL PÜKI BAL. Val binon in lin sirkik blägik.
Dät füna Soga Bevünetik Volapüka binon dät statuda at.
Vobayel binon kaledayel.
Pük calöfik Soga binon Volapük.
Sog no dalabon fundis. Guvan begom lebonedis ad pelön frädis büka äsi seda gaseda e nunotas votik. Üf sog sludonöv ad primön dunotis, kels neodons moni, ozesüdos ad labön nemi dunotadilekana, mobis kleilik, täxeti, fonis monas pespelölis, e baiced Kadäma. Dü e pos dunot somik, dunotadilekan osedon Kadäme alyeliko nunodi dö proged e mons. Üf mons alyelik ad atos valik binonsöv plu ka yurods kiltum, ozesüdos, das Kadäm nemon monikontrolani nelivätik.
Sog steifülon ad konsefön e propagidön sevädi, paki e gebi Volapüka da vol lölik.
Sog vestigon vobotis e dunis pasetikis Volapükanefa.
Sog kuradükon vobotis e dunis nulik in Volapük.
Sog gebon püki, lönedüköl oni pro neods timas nulik, as sam: medü jaf vödas nulik dub Kadäm Volapüka.
Ma vöds Cifala Johann Schmidt in pened privatik: „Vilobs kälön püki at leigoso äsä käloy vöna-Grikänapüki u vöna-Saxadapüki.“
Cifal binon cif löpikün Soga. Dasumon libaviliko cali cifala e vobon lanäliko ad fümükön zeilis Soga. Dugon e pladulon mufi. Dispenon statudis e sludis Kadäma, diplomis xamäbas äsi bligis votik calöfik Soga. Dakipon baläti Volapüka e Volapükamufa. Dilekon kadämi. Cifal kanon, ko baiced plunuma Kadäma, säcälön limani Kadäma. Votaflano, if kadämans cedons, das cifal no fölon bligis oka, plunum onas dalabons gitodi ad säcälön oni e ad dünükön fovani.
Pavälon fa Cifal ko baiced Kadäma; preparon oki ad plaädön Cifali, u nelaidüpiko u laidüpiko, ko slud baicedik Kadäma. Noganükon kolkömas Volapükanefa e yufon Cifali in valem.
Pavälon fa Cifal baicedü Kadäm. Kälon konömi Soga e düno as sekretan e redakan gaseda calöfik Soga, papüböla dub meds bükik e leäktronik.
Calan nelaidüpik povälon ma slud Kadäma.
Slopan binon men alik, kel vipon slopön zeilis Soga e panemön Volapükan.
4.1.1 Ad fovön zeilis Soga Bevünetik Volapüka;
Se Vög Volapüka 2007, Nüm: 1, Pads: 2-8.
|